താമരശ്ശേരി ചുരം വ്യൂ പോയിന്റിൽ കാർ നിർത്തി കാഴ്ചകാണവെ കാറിന്റെ താക്കോൽ കുരങ്ങ് തട്ടിയെടുത്ത് ഓടി. താക്കോൽ വീണ്ടെടുക്കാൻ ശ്രമിക്കവെ യുവാവ് കൊക്കയിലേക്ക് വീണു. മലപ്പുറം പൊൻമുള സ്വദേശി അയമുവാണ് അപകടത്തിൽപ്പെട്ടത്. വൈകിട്ട് 6 മണിയോടെയാണ് സംഭവം. ചുരം ഒമ്പതാം വളവിലെ വ്യൂപോയിന്റിൽ വെച്ചാണ് അപകടമുണ്ടായത്.
കുടുംബത്തോടൊപ്പം വിനോദയാത്രക്കെത്തിയതായിരുന്നു യുവാവ്. 80 അടി താഴ്ചയിലേക്കാണ് വീണത്. പിന്നീട് ഫയർഫോഴ്സ് എത്തി വടം കെട്ടി താഴേക്കിറങ്ങിയാണ് ഇദ്ദേഹത്തെ രക്ഷപ്പെടുത്തിയത്. സാരമായി പരിക്കേറ്റ അയമുവിനെ വൈത്തിരിയിലെ ആശുപത്രിയിൽ പ്രവേശിപ്പിച്ചു.
